De Spackfuhr. - Illustriertes Erzgebirgisches Sonntagsblatt

Direkt zum Seiteninhalt

Hauptmenü:

De Spackfuhr.

Erzgebirgshumoreske von Georg Langer, Annaberg.  Illustrationen von Rudolf Köselitz, München.

(Schluß.)

"Siehste" — saht dr Moritz — "iech hob's glei gesaht — schie Wattr is 43 — na du bestandst odr drauf — in Trambuch (1) ständ 42 — när dan Schodn dan mr nu hobn — un blamiert hobn mir uns ubndraufnauf noch".

Se machetn nu mit dan gewonnene paar Guldn weitr — un kafetn Mahl un Spack ei — trankn ah noch ä paar Tipple Bier un machetn sich gegn Ohmd ofn Hemmwag. — Unrwags fing's ah noch a ze regne — dr Moritz hatt sei Zeig ins neiwaschne Taschentichl gewicklt un hatt's Packl iebr dr Achsl an Stackn gehängt — dr Potvettr trug sei Packl unrn Arm. — Wie se bis zr Brauerei warn — kehretn se noch emol in Bierkallr bein Albin ei — hobn do noch ä mannichs Tippl Bier geschmattrt un kame ganz schie in Schwung. Se machetn sich odr doch wiedr ofn Wag — 's kam ah ä Fuhrwerk — ä Lettrwogn — un se warn fruh — doß se mitfahrn konntn.

"Na, komm rauf ofn Wogn", saht dr Potvettr zun Moritz.

Dar gab sich en Schwung — un uhm war'r — doch klitsch, lag sei Packl untn.

"Halt, halt" — schrie'r zum Fuhrmah — un klatteret wiedr nunnr. — 's Tichl un de Mahltüt warn geplatzt — un de Hälft Mahl lag in Drack.

"Ah noch drzu — vrflixt noch emol — nu könne mr en Quark un ken Heefnkluß backn — wärn mr liebr weitr gelofn — do wär's net passiert" — saht'r — un packet, wos'r noch rettn konnt, wiedr zesamm. — 'r stieg nu wiedr nauf ofn Wogn, setzet sich zeracht un lus ging de holprige Fuhr. —

"Bessr schlacht gefahrn — als naß gelofn" — menet dr Vettr Edeward.

"Ahm", gahnet vr Müdigkeet dr Moritz — un fing a eizeschlofn. Sei Packl hielt'r odr fest unnern Arm. Ah dr Edeward fing a ze nickn trotz dan Wogngerassl un Geholpr. Su kame se ganz schie von Flack — doch of emol gab's en Ruck — dr Fuhrmah hat agehaltn — un's hieß aussteign.

"Wu is dä mei Packl mit'n Speck", frug dr Moritz — "nu das wär erscht noch".

Ja — 's war wag un blieb wag — 's mocht abn durch de Lettrn gerutscht sei.

"Nu do — ah dos noch — Pach ibr Pach", — gammeret dr Moritz.

Dr Fuhrmah suchet mit dr Laterr — un saht — "do hot's ewos im dr Achs drimgewärgt".

Un werklich — 's war noch ä Stickl von Moritz sein Tichl — un ah Mahl un Spackgeschmier dra.

"Na su ene Spackfuhr ho iech noch net gemacht" — lachet dr Fuhrmah — krieget von jedn ä paar Neigrosch Trinkgald — un fuhr weitr.

Dr Potvettr war fruh — doß'r sei Zeig noch hat — 's war ja von Regnwattr ah dorchweecht — un zun Moritz menet'r:

"Weßte mr kehrn bein Meyer-Fleschr noch emol ei, do kaste dr ä Schrietl
(2) Spack — doß de deinr Male zewenigstns ewos mit ehemm brengst — un's Mahl — sogste — wär zrweecht".

"Hast racht" — saht dr Moritz — "Do ho iech wenigstns ene Halfred".

Su hobn si's ah gemacht — un sei ehemm. De Male war noch auf — wie's ne Moritz neigedreht bracht — 'r leget sei Packl ofn Tisch un fing nu von dan Lottogewinn a zo drzehln — bluß im enr Nummer hätt sich's gehannlt — odr do wär bluß dr Potvettr dra schuld. Dr wollt's allemol bessr wissn.

"Un iech hat mrsch su schie ausgemolt — wos mr allis von dan gewonnene vieln Gald hättn kafn könne" — saht de Male — un packet nu dos Packl auf.

"Wos is dä dos — ofn behmischn Spack unsr Schlachthufstempl? — un's Mahl — wu haste dä dos?" — watteret de Male lus. —

Ne Moritz wursch emol kalt un emol warm — un 'r gestand nu 's ganze Ugelick ei — zerletzt saht'r noch:

"Dos ene sog iech — wenn iech wiedr mol nei noch Behme mach — do mach iech kene solche Spackfuhr mehr mit — do wärd naus un rei gelofn — odr mr fahrn mit dr Eisnbah".

"Odr noch bessr" — saht de Male — "iech gieh mit — doß'r eich bein Biertrink'n net esu ibrname könnt" — löschet de Tischlamp aus — un ginge zesamm ze Bett.


Erzgebirgisches Sonntagsblatt
Nr. 19 v. 9. Mai 1926


zurück

Erzgebirgisches Sonntagsblatt 119. Jahrgang, Nr. 19, 9. Mai 1926, S. 7

Start | 1926 | 1927 | 1928 | 1929 | 1930 | 1931 | 1932 | 1933 | 1934 | 1935 | 1936 | 1937 | 1938 | 1939 | 1940 | 1941 | Datenschutzerklärung | Impressum | Sitemap
Zurück zum Seiteninhalt | Zurück zum Hauptmenü